O “Santo Graal” do Cebreiro

O municipio de Pedrafita do Cebreiro foi considerado ao longo da historia un lugar estratéxico de paso. Así o testemuñan os camiños que xa durante as épocas romana e medieval atravesaron estas terras. O Camiño de Santiago é o referente que deu a maior proxección internacional a terras lucenses e a entrada en Galicia pola aldea de O Cebreiro constitúe un fito fundamental na peregrinación a Terra Santa.

Neste singular pobo de montaña, situado a uns 1330 metros de altitude, consérvanse as pallozas, típicas construcións de gran valor etnográfico, xunto cun santuario  prerrománico visitado anualmente por miles de peregrinos. Unha auténtica torre de  babel que contempla as reliquias dun milagre sucedido en torno ao ano 1300 e que deu a volta ao mundo da man tanto dos peregrinos que van a Santiago como dos romeus que acoden a este lugar cada 8 de setembro.

E é que segundo a lenda, a fría noite do 24 de decembro dese ano, un veciño da aldea de Barxamaior asistiu ao oficio relixioso da misa do galo. Debido ás dificultades de acceso na subida a O Cebreiro pola forte nevada que caera esa noite, o home non puido chegar ata o momento da consagración. Ao entrar, o sacerdote mirouno con certo desprezo por pasar semellantes penurias só para chegar á igrexa e prostrarse ante o pan e o viño. Pero nese preciso instante foi cando sobre o cáliz e a  patena obrouse o milagre: o pan converteuse en carne e o viño en sangue. O sacerdote caeu esborrallado e a imaxe da Virxe co Neno do altar inclinou a cabeza para contemplar o prodixio, quedando nesa postura para a posteridade.

As reliquias de O Cebreiro espertarían un século máis tarde o interese dos Reis Católicos, quenes doaron o relicario, que aínda hoxe se conserva exposto nunha das capelas laterais da cabeceira do santuario.

A transcendencia histórica e social da lenda do milagre do Cebreiro fai que hoxe nos refiramos ao sucedido como o “Santo Graal”, en alusión ao cáliz e á  patena onde se produciu a  transubstanciación que deu orixe a este mito presente no escudo de Galicia.