Xeodestino A Mariña Lucense
O xeodestino Mariña Lucense comprende os municipios de Alfoz, A Pontenova, Barreiros, Burela, Cervo, Foz, Lourenzá, Mondoñedo, Ourol, O Valadouro, O Vicedo, Ribadeo, Riotorto, Trabada, Viveiro e Xove.
Neste espazo, delimitado polo mar Cantábrico ao norte e a Serra do Xistral ao sur, atopamos paisaxes de interese natural, bens do patrimonio cultural, centros históricos, unha gastronomía que nos ofrece os mellores produtos do mar e do campo e unha nutrida axenda de grandes eventos que constitúen a mellor escusa para aproximarnos a este destino en calquera época do ano.
NATUREZA
Os máis de 140 quilómetros de litoral que moldean a costa lucense son unha sucesión de areais, portos pesqueiros e deportivos e pobos costeiros como Ribadeo, Foz, Burela, San Cibrao e Viveiro, que son unha referencia para o turismo estival. Esta liña de costa presenta ademais un alto valor xeolóxico que se fai patente na rasa que se estende desde Ribadeo ata Burela e que conta con lugares destacados como a Praia das Catedrais-Augasantas, declarada Monumento Natural. Neste lugar, a arquitectura do mar pode observarse nos seus cantís, esculpidos a golpe de vento e ondada.
A zona costeira da Mariña é ademais un referente para os amantes da ornitoloxía. Tres das catro Zonas de Especial Protección de Aves da provincia de Lugo atópanse na contorna das rías de Ribadeo e Foz e no tramo do sector occidental da Mariña, onde a rasa litoral deixa paso a unha zona de cantís máis agreste que nos regala espectaculares estampas en lugares como o Faro da Roncadoira, Monte Faro en Viveiro ou a punta Socastro, popularmente coñecida como O Fuciño do Porco, no Vicedo.
Pero máis aló das Catedrais e da zona litoral, a riqueza medioambiental da Mariña Lucense móstrase no mosaico de ecosistemas que forman os diversos espazos naturais que contan con algunha figura de protección: o seu tramo oriental, que inclúe os concellos de Ribadeo, Trabada e A Pontenova, está integrado na Reserva da Biosfera Eo-Oscos e Terras de Burón, sendo o seu fío condutor o curso do Eo, que forma parte da Rede Natura 2000 e cuxo esteiro conta tamén coa distinción de zona húmida protexida. Doutra banda, os concellos de Alfoz, Valadouro e Mondoñedo forman parte da Reserva da Biosfera Terras do Miño e atópanse nos contrafortes da serra do Xistral, que acada o seu cumio nos 1062 metros do Alto do Cadramón.
No municipio de Viveiro, o Souto da Retorta conduciranos entre os seus sendeiros cara os que están considerados os eucaliptos máis grandes de Europa. Máis de 600 exemplares de enormes dimensións entre os que destaca o coñecido como o Avó, un eucalipto cuxa altura supera os 60 metros. E no interior, Mondoñedo conta co privilexio de acoller a cova máis grande explorada en Galicia ata a data: a cova do Rei Cintolo, onde a lenda sitúa un reino sepultado por feitizo.
Para gozar da natureza da Mariña recoméndase percorrer os numerosos roteiros de sendeirismo que conforman a oferta turística dos diferentes municipios e que nos conducirán polos cursos fluviais, pola liña de costa e ata inmensas fervenzas que convidan a adentrarse na natureza e deixarse levar polo son da auga.
PATRIMONIO CULTURAL
A Mariña é moito máis que praia. Os centros históricos de Mondoñedo e Viveiro trasladarannos ata a Idade Media e Moderna polo trazado das súas estreitas rúas, os seus pazos urbanos e o seu patrimonio relixioso e literario. Doutra banda, no casco histórico de Ribadeo pervive a pegada dos armadores, industriais e indianos que deixaron o seu sinal nunha arquitectura que mostra a puxanza social e económica de antano e que hoxe se traduciu nun dinámico e atractivo comercio.
Visitar A Mariña é tamén seguir os pasos de ilustres personaxes como o Mariscal Pardo de Cela e Antonio Raimundo Ibáñez, Marqués de Sargadelos. Ambos marcaron importantes fitos na historia da Galicia medieval e industrial e deixaron un legado cultural que permite reconstruír as principais pasaxes da súa vida e a súa morte: lugares como a torre de Castro de Ouro de Alfoz, o alto da Frouxeira en Foz, a ponte do Pasatempo de Mondoñedo ou o Conxunto Histórico- Artístico de Sargadelos, onde hoxe se fabrica unha das cerámicas máis recoñecidas de Galicia, son xa lugares intimamente ligados á súa memoria.
O Camiño Norte de Santiago, Patrimonio da Humanidade dende o 2015, tamén atravesa terras da Mariña Lucense. O seu trazado, dende Ribadeo ata Mondoñedo, serve como como fío condutor para visitar lugares de interese monumental como o mosteiro de San Salvador de Lourenzá ou a Catedral- Basílica da Asunción de Mondoñedo, que tamén conta coa declaración de Ben Mundial.
Outros significativos recursos monumentais da Mariña son a igrexa románica de San Martiño de Mondoñedo, considerada a catedral máis antiga de España, a fortaleza de Tovar de Lourenzá ou vestixios arqueolóxicos como o castro de Fazouro, único xacemento castrexo escavado no litoral cantábrico ata día de hoxe.
No referente á oferta museística, o mundo do mar está presente nas exposicións do Museo do Mar de San Cibrao e no barco –museo boniteiro Reina del Carmen de Burela. Destacados son tamén os museos de arte sacra como o Diocesano de Mondoñedo ou o de San Salvador de Lourenzá. Ademais, na Mariña existen outros equipamentos de referencia que nos permiten aproximarnos ao conxunto dos valores do territorio, caso da exposición A Mariña Virtual ou o Centro de Interpretación de San Martiño en Foz.
E non menos importantes son os talleres artesáns que completan a oferta cultural do destino: o barrio dos Muíños de Mondoñedo é un lugar de referencia para rememorar novos e vellos oficios que se deben á arte dos mestres artesáns que aquí desenvolven a súa labor. Outros centros de referencia son o Regal Xunqueira e os talleres de xoiería en Viveiro, así como aqueloutros oficios estreitamente ligados ao mundo do mar e que perviven grazas á labor das redeiras de Burela ou ao carpinteiro de ribeira de San Cibrao.
GASTRONOMÍA
Na Mariña Lucense, o Cantábrico garda baixo as súas enérxicas e batidas augas excelentes peixes e mariscos que non poden faltar nas mesas máis esixentes: pescada do pincho de Celeiro, ourizos de mar, percebes, berberechos, bonito de Burela, sardiñas, rape, robalizas, polbo, navallas, luras, nécoras, centolas, lagosta e outras exquisiteces mostran a importante actividade marisqueira e pesqueira dos portos da costa lucense.
E no interior, o abrigado val de Lourenzá reúne as condicións idóneas para o cultivo da faba que leva o nome deste municipio e que conta con Indicación Xeográfica Protexida, estendéndose a súa zona de produción e envasado ao conxunto da Mariña Lucense.
No que se refire ás sobremesas, destaca a torta de Mondoñedo, unha deliciosa combinación de améndoa, cabelo de anxo e masa follada que podemos atopar nas confeiterías locais. Tamén gozan de extraordinaria fama as pastelerías de Viveiro e o obradoiro do convento de Santa Clara de Ribadeo, onde se poden adquirir directamente os afamados doces elaborados polas relixiosas.
FESTAS DE INTERESE TURÍSTICO
A Mariña é sinónimo de festa. Practicamente todos os meses do ano é posible gozar dalgún gran evento que renda homenaxe aos seus produtos gastronómicos, á súa historia ou ás súas tradicións populares.
Entre as festas destaca a Semana Santa de Viveiro, declarada de Interese Turístico Internacional ou a feira do Bonito de Burela, recentemente recoñecida como Festa de Interese Turístico Nacional. Están declaradas de Interese Turístico de Galicia as festas da Maruxaina, a do ourizo e a Queimada Popular de Cervo, a feira das San Lucas e o mercado medieval de Mondoñedo, a romaría de Santa Cruz de Ribadeo, a festa do emigrante de Barreiros, a festa da troita da Pontenova, a Semana Santa de Mondoñedo, a festa da faba de Lourenzá, as patronais de San Lourenzo de Foz e ademais O Naseiro, a festa da pescada do pincho de Celeiro e a Rapa das Bestas de Candaoso en Viveiro.
Preme AQUÍ para acceder á web de Turismo da Mancomunidade de Municipios da Mariña Lucense.
Preme nas seguintes ligazóns para acceder ás webs de Turismo municipais:
O Vicedo Viveiro Ourol Xove Cervo Burela Foz Barreiros Ribadeo A Pontenova Riotorto Trabada Mondoñedo Lourenzá O Valadouro Alfoz