Xeoturismo na Ribeira Sacra e O Courel

PUNTOS DE INTERESE XEOLÓXICO NA RIBEIRA SACRA E O COUREL

 

Cañón del Sil
Cañón del Sil
Cañón del Sil
Cañón del Sil

 

O CANÓN DO SIL

Os 25 últimos quilómetros que o Sil percorre ata o seu encontro co Miño nos Peares constitúen un dos maiores prodixios xeolóxicos de Galicia. A profunda garganta granítica orixinada por forzas tectónicas que o curso fluvial foi labrando no transcurso dos séculos é o simbólico punto de confluencia entre as provincias de Ourense e Lugo e o buque insignia da Ribeira Sacra, terra de ermitáns onde a pegada medieval pervive na súa arquitectura relixiosa.

As singularidades climáticas da zona propician a convivencia de bosques autóctonos con especies mediterráneas como érbedos e sobreiras. O cultivo da vide en bancais de vertixinosa pendente fai deste espazo un lugar cheo de dinamismo que nos últimos anos se consolidou como un referente para o turismo rural e enolóxico e agora tamén para o xeoturismo. Ademais, 5914 hectáreas do Canón do Sil foron incluídas na Rede Natura 2000 como Zona de Especial Conservación, un recoñecemento que abarca a zona máis abrupta e escarpada do Canón, con desniveis de ata 500 metros de altitude que forman sobrecolledores desfiladeiros sobre os que caen enérxicas fervenzas e a cuxo abismo asoman impresionantes miradoiros.

Para gozar deste espazo natural en todo o seu esplendor existen diversas alternativas que nos permitirán aproximarnos a estes “ fiordos galegos”, ben navegando polas mansas augas do encoro de Santo Estevo, realizando unha ruta en coche polos miradoiros máis emblemáticos ou a bordo dun tren turístico que nos levará entre as milenarias vides de Amandi.

Máis información:

Rutas en catamarán

Tren turístico

 

Pliegue Sinclinal de Campodola
Courel -Devesa da Rogueira
Courel
Museo geológico- Quiroga

 

O COUREL: REFERENTE MUNDIAL EN XEOLOXÍA

Á xa coñecida singularidade botánica e diversidade faunística, cultural e etnográfica da Serra do Courel súmase a súa historia xeolóxica, que deixou neste espazo natural algúns dos lugares máis relevantes a nivel mundial neste ámbito, concentrando un terzo das paraxes galegas incluídas na lista Global Geosites.

O Courel é produto da oroxenia alpina que levantou a Cordilleira Cantábrica e da tectónica de placas que ao confluír formaron o macrocontinente Panxea. Un dos resultados máis visibles deste proceso é a formación do gran pregamento sinclinal de Campodola – Leixazós, que foi declarado Monumento Natural. Á importancia do soberbio sinclinal únense outros puntos de interese xeolóxico como os afloramientos calizos do Val das Mouras, o val do Visuña, as pegadas glaciares da Rogueira e a lagoa de Lucenza, covas kársticas como A Buraca dás Choias, os depósitos glaciares da Seara ou as louseiras. Todos eles conforman un paraíso para os amantes da xeoloxía, aínda que non todos son accesibles ao público ou só se poden visitar da man de colectivos ou profesionais expertos.

Aos atractivos xeolóxicos naturais da Serra do Courel únense aqueles en os que a man do home xogou un papel esencial. É o caso dos vestixios vinculados á minería aurífera, actividade que alcanzou un intenso desenvolvemento durante a romanización e que deixou como testemuñas elementos como o túnel de Montefurado, a Mina da Toca, as minas de Margaride na Pobra do Brollón ou castros mineiros como o da Torre, en Sobredo.

Por todas estas razóns, a UNESCO declarou esta zona do Courel, que abrangue os municipios de Quiroga, Folgoso do Courel e Ribas de Sil Xeoparque Mundial, sendo a primeira zona de Galicia e o noroeste de España en acadar este recoñecemento.

Para realizar unha aproximación didáctica á evolución xeolóxica da zona, acondicionáronse algúns miradoiros que permiten visitar puntos de interese relacionados con esta temática: é o caso dos miradoiros de Campodola, As Fontes, A Pómez e Mostad. Ademais, o museo xeolóxico de Quiroga é todo un referente en materia de divulgación científica do pasado xeolóxico e paleontolóxico da provincia de Lugo.

Máis información:

Museo Xeolóxico de Quiroga