O Presidente mostra a súa satisfacción tras coñecer que a Ribeira Sacra é finalista a Patrimonio da Humanidade
O Presidente da Deputación de Lugo, José Tomé, mostrou este venres a súa satisfacción logo de coñecer que a Ribeira Sacra será finalista na 45 sesión do comité do Patrimonio Mundial da Unesco en 2021. Tomé considera este novo paso esencial para conseguir a tan ansiada aspiración e pon en valor o impacto positivo que terá para a zona e a provincia a nivel turístico e económico.
José Tomé lembrou que a Deputación de Lugo foi a impulsora do movemento social e institucional en apoio á candidatura da Ribeira Sacra a Ben Mundial organizando o percorrido dun autobús por todo o territorio para a recollida de sinaturas. Logo, lembrou, fóronse sumando outras institucións, como a Deputación de Ourense ou a Xunta de Galicia. “Continuaremos traballando coas mesmas forzas que ata o de agora para culminar esta aspiración e que este paraíso no interior de Galicia, que é a Ribeira Sacra, sexa declarado Patrimonio da Humanidade pola UNESCO”.
O Presidente subliñou neste sentido que a Ribeira Sacra é unha das zonas más importantes de Galicia e que destaca como marco xeográfico polo seu medio ambiente e as súas paisaxes; como escenario da historia, por ela pasan o Camiño Francés e o Camiño de Inverno, dous dos traxectos da ruta Xacobea, e atesoura un rico patrimonio arquitectónico sobre todo de estilo románico. Dende o punto de vista etnográfico, o seu xeito de traballar a terra, especialmente coa viticultura heroica, danlle unha personalidade única.
A candidatura da Ribeira Sacra para ser declarada Patrimonio da Humanidade foi presentada ante a Unesco o pasado mes de febreiro e a súa aprobación avaliarase o vindeiro ano, na asemblea do mes de xuño de 2021 xunto a outras 22 candidaturas do resto do mundo.
